Dit is opnuut ‘n heerlike voorreg om te getuig dat Laerskool Aliwal-Noord ‘n waardegedrewe skool is wat voortdurend daarna streef om goeie geleenthede te skep vir leerders om begelei te word op hulle ontdekkingsreis van die lewe.

2026 is ons jaar van vernuwing! Ons kyk na die verlede en weet daarsonder sou ons nie wees waar ons is nie. Ons dankbaarheid vir die mense wat diep spore getrap het in Laerskool Aliwal-Noord, ken geen perke nie. Die fondasies is stewig gelê en elke generasie se bydrae het ‘n groot verskil gemaak in die opvoedingsarena waarin ons, ons tans bevind. 

As ons na die toekoms kyk, weet ons dat ons ‘n veranderende wêreld tegemoetgaan. Tegnologie is hier om te bly, maar ongelukkig ontdek ons ook die negatiewe sy hiervan. Daarom fokus ons op die positiewe aspekte en het van die begin van hierdie jaar met Kodering begin. Die rekenaarklas is steeds in volle swang en met jong onderwysers wat vuur-en-vlam oor tegnologie is, is die klasse volgepak met interessanthede.